Yanditswe kuya 2017-11-18 06:22:39
Urubyiruko rurangije amashuli yisumbuye rushobora kuzajya rumara umwaka umwe ku rugerero
Ibitekerezo:  0 Abayisuye: 5051


Perezida w’Itorero ry’Igihugu, Bamporiki Edouard, yatangaje ko hari kwigwa uburyo igihe urubyiruko rwakoraga urugerero cyongerwa kikagera ku mwaka rukora imirimo ifitiye Igihugu akamaro ndetse ruhugurwa ku ndangagaciro nyarwanda no kwihangira imirimo, rudataha iwabo ahubwo rutunzwe na Leta. Urugeroro ubu rukorwa n’abanyeshuri barangije amashuri yisumbuye, mu gihe bagitegereje amanota abemerera gukomeza kwiga muri Kaminuza n’amashuri makuru.

Kuri uyu wa Gatanu, mu nama rusange ya mbere abanyeshuri bahagarariye abandi muri Kaminuza n’amashuri makuru byo mu Rwanda (Intagamburuzwa General Assembly) nibwo iki cyifuzo cyatangarijwe.

Bamporiki yabisobanuye agira ati “ Bakora urugerero rutanga umusaruro muke kuko bakora bataha iwabo. Turashaka ko ruba ingando, aho abantu baba hamwe, bagakora ibikorwa biri hamwe, bagasubiza ikibazo niba ari icy’Akarere cyangwa Umurenge.

Ubundi abakurambere bacu, bakoraga urugerero ruciye ingando, bakavuga ngo Akarere gafite ikibazo cy’imisarani, intore zose zikava mu gihugu hose zikajyayo, zikazavayo ziyujuje, byananirana bakazigemurira.” "

Yongeye ati “Icyo navuze rero cyo kuba Urugerero ruciye ingando rwamara umwaka ni icyifuzo. Ntabwo abana bacu bakwiye kujya bamara umwaka barangije ayisumbuye, ari aho badafite icyo bakora, cyangwa se n’urangije Kaminuza ari umushomeri. Ni inshingano zacu mu itegeko tugiye gushaka, ni gute urugerero rwaba igisubizo cy’ibibazo biri mu muryango nyarwanda.”

Yakomeje avuga ko iyi gahunda itarumvikanwaho n’inzego bireba zirimo Minisiteri y’uburezi, aho yakomeje agira ati “ muribuka ko hari igihe abanyeshuri bamaraga umwaka wose biga indimi zo hanze muri Kaminuza(EPLM). Nta bwo umunyarwanda yaba yaramaraga umwaka wose yiga indimi z’amahanga ngo ananirwe kuba yakora urugerero rumara umwaka akorera igihugu imirimo igifitiye umumaro.”

Bamporiki yavuze kandi ko uretse kuba rukora imirimo ifitiye igihugu akamaro, ari n’igihe cyiza urubyiruko rwabona cyo gutekereza uburyo rwakwigobotora ingoyi y’ubushomeri, dore ko n’ubundi rukora urugerero rukirangiza amashuri yisumbuye rutarabona akazi kandi ko bizanaca abo wasangaga bajya mu kazi bakarangwa n’imico mibi irimo ubusinzi, kunywa ibiyobyabwenge n’ibindi, kuko bazajya barangiza urwo rugerero bafite umuco n’indangagaciro bya Kinyarwanda.

Umuhuzabikorwa w’Intagamburuzwa ku rwego rw’Igihugu, Eustache Ndayisaba, yavuze ko mu gihe urwo rugero ruzaba rutangiye bizagirira akamaro abanyeshuri. Ati “Ikintu cya mbere igihugu kiba giteze ku muntu ni uko agiteza imbere kandi umunyagihugu mwiza ni ukora mu nyungu zacyo

Ku giti cyanjye ndetse n’abo mpagarariye, ndumva ari ikintu cyiza, kuko igihugu cyemera kubafasha mu byo bakeneye kuko n’ubundi hari igihe usanga umuntu ava mu mashuri yisumbuye agahita aza muri Kaminuza nubwo tugira icyumweru kimwe cyo kumenyereza, ugasanga ntabwo yabyumvise neza ku buryo amenya aho ari.”

Muri iyi minsi, urugerero ruciye ingando ruhuza abanyeshuri baba bagize amanota meza kurusha abandi, aho bahurira hamwe mu karere bagatozwa umuco n’indagagaciro bya Kinyarwanda banakora n’imirimo ifitiye igihugu akamaro, hakaba n’urundi rwo ku rwego rw’Igihugu ruhuza abandi bahize abandi mu turere, bagahurira mu Karere kamwe nabo mu bikorwa nk’ibyo

Yanditswe na Gisele Nishimwe


style="display:inline-block;width:350px;height:300px"
data-ad-client="ca-pub-2460108950092726"
data-ad-slot="6397865272">

-->
INGUFU.com nirwo rubuga wasomagaho iyi nkuru
IBITEKEREZO
Untitled Document
Tanga igitekerezo kuri iyi nkuru