Yanditswe kuya 2017-12-27 04:54:58
Perezida Kagame yifurije Ingabo umwaka mushya anabashimira akazi bakora
Ibitekerezo:  1 Abayisuye: 2201


Perezida Paul Kagame, akaba n’Umugaba w’Ikirenga w’Ingabo z’u Rwanda, mu butumwa busoza umwaka yageneye Ingabo z’u Rwanda, yashimye umurava n’ubwitange bakoranye akazi kabo bashinzwe ko kurinda umutekano w’Abanyarwanda no mu rwego mpuzamahanga.

Muri ubwo butumwa, Umukuru w’Igihugu agira ati “Mu izina rya Guverinoma y’u Rwanda, umuryango wange, no mu izina ryange bwite mbifurije Noheli nziza no kuzagira umwaka mushya muhire wa 2018, mu gihe dusoza umwaka wa 2017, tuboneraho umwanya ndetse n’amahirwe yo kureba imbere tukazirikana intego z’ingenzi ndetse n’akamaro karebana n’akazi mwakoreye igihugu, nk’abagabo n’abagore bari bambaye umwambaro w’akazi n’ibendera ry’igihugu.”

Umukuru w’Igihugu Paul Kagame yakomeje ashimira Ingabo z’Igihugu, abishingira ku kuba mu mwaka wose wa 2017 haba mu gihugu cyangwa hanze yacyo batarahwemye kwitanga bidasanzwe bagamije kurinda igihugu n’abaturage bacyo, kuko asanga ari bimwe abaturage mu gihugu bakesha amahoro n’umutekano hamwe n’ituze byafashije igihugu kugera ku iterambere gifite ubu, haba mu rwego rw’ubukungu n’imibereho myiza, nubwo ibibazo bitabura haba mu karere no mu rwego mpuzamahanga.

Akomeza agira ati “Hanze y’imipaka y’igihugu mwakomeje ibikorwa byo kurinda umutekano, ndabashimira akazi mukomeje gukorana umurava, ubwitange n’ubunyamwuga, kuramira ubuzima, mukagarura amahoro, umutekano n’ituze aho bitari, n’iyo mpamvu bamwe muri mwe mutabashije kwishimana n’imiryango yanyu muri iyi minsi mikuru, ntawabura kubashimira ubwo bwitange bwanyu budasanzwe, kuko mukomeje kuba abambasaderi bakomeye b’u Rwanda mugaragaza indangagaciro n’amahame musanganwe muzigisha n’abavandimwe banyu mukorana umuco w’Abanyarwanda. Birakwiye rero ko tuzirikana izo ngamba n’ibyakozwe atari ukubyishimira gusa, ahubwo kureba uburyo hakorwa ibirushijeho mu nyungu z’igihugu cyacu.”

Ku byerekeranye n’ibimaze gukorwa kugeza ubu, Perezida Kagame yibukije ko Abanyarwanda hari ibyiza babategerejeho, avuga ko ari wo musaruro ukomoka ku kazi keza Ingabo z’Igihugu zikorera igihugu, kandi ari wo ufitiye akamaro Abanyarwanda bose.

Ati “Umwaka dusoje nubwo utari woroheye buri wese, uwo dutegereje wa 2018 turasaba gushyiramo imbaraga, cyane ko uko iminsi igenda ishira hagenda haboneka zimwe mu mpinduka zizana ibibazo by’umutekano bikenewe gukurikiranirwa hafi kandi vuba.

Rero murasabwa kubikorana ubwitonzi n’ubushishozi, Abanyarwanda bakwiye kumenya ko indangagaciro, ubwitange busanzwe, ubumenyi ndetse n’ibikoresho bigezweho bigenda biboneka, ari bumwe mu buryo buzadufasha kurwanya no kwirinda ibibazo byose bishobora kuvuka, maze igihugu cyacu kikarushaho gukomera no gutekana.

Uyu mwaka mushya rero ni amahirwe tubonye yo kwiyemeza gukorera igihugu mu bitekerezo byanyu n’amasengesho byatuma mukomeza kwiyemeza kugikorera, mufatanyije mukubakira ku byagezweho mugamije kugeza ku banyarwanda ibindi birushijeho, bityo igihugu gikomeze kubagirira ikizere n’icyubahiro mukwiye mwagezeho mu myaka yashize. Mugire amahoro y’Imana mwese kandi Imana ihe umugisha igihugu cyacu.”

Yanditswe na Gisele Nishimwe


style="display:inline-block;width:350px;height:300px"
data-ad-client="ca-pub-2460108950092726"
data-ad-slot="6397865272">

-->
INGUFU.com nirwo rubuga wasomagaho iyi nkuru
IBITEKEREZO
Untitled Document
Tanga igitekerezo kuri iyi nkuru