Yanditswe kuya 2018-01-02 03:05:30
2017 umwaka w’umukara kuri ruhago mu Rwanda, dore ibihe byashegeshe Abanyarwanda
Ibitekerezo:  0 Abayisuye: 3105

Umunyarwanda yaciye umugani agira ati : “Burya ukize inkuba arayirata” mu isi ya ruhago mu Rwanda, abakunzi b’uyu mukino hari ibihe by’ingenzi byaranze umwaka ushize wa 2017 waje kubasigira ibikomere n’icyasha ku mutima batazibagirwa vuba.

Ikipe kwanga gutwarira igikombe muri shampiyona
Hari ku itariki 17 z’ukwezi kwa Gicurasi nyuma y’umukino wahuje ikipe ya Rayon Sport n’ikipe ya Mukura Victory Sport iyi kpe yari yarangije gushyira akadomo ku gikombe cya kinirwaga cya Shampiyona imaze kucyegukana.

Nyuma yo kucyegukana iyi kipe yifuje ko yahabwa iki gikombe ku mukino yagombaga kwakira wari kuyihuza n’ikipe ya APR gusa ishyirahamwe ry’umupira w’amaguru mu Rwanda riza kuyibwira ko bidashoboka ko ahubwo igomba kugihabwa ku mukino usoza shampiyona wagombaga kuyihuza na Kiyovu Sport.

Ibintu byakuruye umwuka utari mwiza kugeza ubwo iyi kipe yanga nabwo kugifata ahubwo igahitamo kugihererwa ku mukino wa gishuti wayihuje n’ikipe ya AZAM FC yo muri Tanzania ku itariki ya 8 Nyakanga 2017.

Ibura ry’umuriro kuri sitade bigata bamwe muri yombi
Abakunzi ba ruhago mu Rwanda ntibashobora kwibagirwa ibyababere kuri sitade Umuganda iherereye mu karere ka Rubavu ku itariki ya 23 Nzeli 2017 ubwo umuriro wabuzeikipe ya Rayon Sport imaze gutsinda ibitego bibiri kubusa ikipe ya APR ku mukino wa Super Cup wagombaga guhuza ikipe yatwaye shampiyona n’iya twaye igikombe cy’amahoro.

Ibintu byasize isura mbi FERWAFA kugeza ubwo hafashwe icyemezo cyo guhagarika umukino ukazasubukurwa hakinwa iminota micye yari isigaye ku gice cya kabiri cy’umukino ngo umukino urangire.

Abanyarwanda guterwa ishavu n’amavubi
Ikipe y’igihugu Amavubi uyu mwaka yasubiye inyuma ku buryo bugaragarira buri munyarwanda wese haba mu karere ndetse no muri Afurika muri rusange.

Mu kwezi ku Ukuboza umwaka wa 2016 kwasize ikipe y’igihugu Amavubi ahagaze ku mwanya wa 92. Ibintu byahise biba amateka kuva muri Mutarama 2017 ubwo yatangiye kugenda isubira inyuma umunsi ku munsi kugeza ubwo uyu mwaka ugeze ku musoza igihugu cy’u Rwanda kigeze ku mwanya w’113 kurutonde rwa FIFA.

Urupfu gutwara abakinnyi n’abatoza imburagihe
Uyu mwaka by’umwihariko ku bakunzi b’ikipe ya Rayon Sport byabagora ko bakwibagirwa urupfu rwatwaye Evariste Mutuyimana apfuye urupfu rw’amarabira ndetse na Ndikumana Katauti hamwe na Hategekimana Bonaventure bapfiriye umunsi umwe. Aba bose bakaba barakiniye iyi kipe mu gihe Katauti we yapfuye ari mu mirimo y’ubutoza muri iyi kipe.

Agatima kugaruka impembero ku banyarwanda kaje kugaruka ubwo Amavubi yabonaga itike yo gukina imikino ya CHAN igomba kuba muri uyu mwaka mu gihugu cya Maroc gusa nabwo bikaza gusaba andi mahirwe kuko aya mbere yo yari yananiwe kwikura imbere ya Uganda. Akaza guhabwa amahirwe yo gukina umukino na Ethiopia u Rwanda rukabasha gutsinda iki gihugu.

Ifungwa ry’abakinnyi n’abatoza bya hato na hato
Usize uretse kuba ikipe ya Rayon Sport ibuze abakinnyi n’umutoza wayo bitabye Imana, uyu mwaka usize iyi kipe irimo ibibazo uruhuri ndetse bamwe bageze imbere y’ubutabera kujya gutanga ibisobanuro ku byaha baregwa.

Karekezi Olivier umutoza mukuru w’ikipe ya Rayon Sport ubwo Katauti yari atabarutse uyu mutoza nawe yari ari muri sitasiyo ya polisi yashyikirijwe parike ngo yisobanure kubyaha binyuranye bifitanye isano n’ikoranabuhanga nkuko polisi y’u Rwanda yabitangarije itangazamakuru.

Ntibyarekeyaho kuko abakinnyi babiri b’iyi kipe Eric Rutanga ndetse na Yannick Mukunzi nabo batawe muri yombi na polisi y’u Rwanda kubera amakuru bashakagwaho agendanye n’ikirego cya Karekezi.

Gusa nyuma yaho gato Karekezi Olivier ndetse n’aba bakinnyi bakaba baraje kurekurwa ndetse bitangazwa ko ari abere ku byaha baregwaga.

Umwaka usize FERWAFA irangwamo akajagari
Ishyirahamwe ry’umupira w’amaguru mu Rwanda uyu mwaka wa 2017 ushize usize harangwamo n’ibibazo uruhuri bigenderanye n’itegurwa ry’amatora, umwaka ukaba ushize atanabaye nkuko byari byitezwe ko agomba kuba 2017.

Ibi byatumye bihagurutsa ishyirahamwe ry’umupira w’amaguru ku isi FIFA ryandikira FERWAFA ribasaba gukemura ibibazo biri muri iri shyirahamwe ndetse ribategeka kwigiza inyuma amatora ngo abashe gutegurwa neza.

Erick M. RUZINDANA/INGUFU.COM


style="display:inline-block;width:350px;height:300px"
data-ad-client="ca-pub-2460108950092726"
data-ad-slot="6397865272">

-->
INGUFU.com nirwo rubuga wasomagaho iyi nkuru
IBITEKEREZO
Untitled Document
Tanga igitekerezo kuri iyi nkuru