Yanditswe kuya 2017-03-29 09:00:13
BK yatangije ikigo cy’ ikoranabuhanga rihambaye cyatwaye akayabo k’ amamiliyoni : ‘BK TecHouse’
Ibitekerezo:  0 Abayisuye: 1774

Banki ya Kigali (BK) yatangije ikigo BK TecHouse kigiye kwita cyane ku iterambere ry’ikoranabuhanga no guhanga ibisubizo birishingiyeho

BK iri kwizihiza isabukuru y’imyaka 50 imaze ishinzwe, itangije iki kigo nyuma y’iminsi mike hatangiye ikindi gitanga ubwishigizi, BK General Insurance, na gahunda yiswe ‘Urumuri Initiative’, aho ibitekerezo bitanu by’indashyikirwa mu ikoranabuhanga bizahabwa miliyoni 60 Frw.

Regis Rugemanshuro ugiye kuyobora BK TecHouse nk’Umuyobozi Mukuru, yavuze ko muri iki gihe hakenewe ko hahangwa cyane ikoranabuhanga risubiza ibibazo abaturage bafite, bakazatangirana n’uburenganzira bafite bwo gucuruza internet ya fibres optiques na 4G LTE.

Yagize ati “Ubu dufite ibijyanye na internet, dufite porogaramu yiswe ‘Urubuto’ iri gukoreshwa mu mashuri 29 n’abanyeshuri bagera ku bihumbi 22, tukagira ibikoresho bifasha mu gucunga umutekano, abashaka Camera (soma kamera) zo mu ngo, ibigo by’ubucuruzi bizikeneye, kandi uretse na Camera dushyiramo n’uburyo butuma wumva abantu binjiye iwawe udahari, ariko byose ni ibijyana n’ikoranabuhanga, na internet.”

“Dufite indi mishinga turi gukoraho ariko yo ntabwo irajya ku isoko, irimo ibijyanye n’ubuhinzi, ibijyanye n’ubuvuzi, ndetse n’ibijyanye no kwamamaza, murahishiwe muzabibona vuba aha.”

Porogaramu yiswe ‘Urubuto Education System’ ni imwe mu ziri gutangwa na BK TecHouse, ihuza ababyeyi na porogaramu z’ishuri abana babo bigaho, hakifashishwa telefoni igendanwa mu guhanahana amakuru hagati y’ishuri n’abandi bafatanyabikorwa mu myigire y’abana.

Harimo nko kuyikoresha mu kwishyura amafaranga y’ishuri, gusangira amakuru y’uko umunyeshuri atira ibitabo mu isomero ry’ikigo yigaho cyangwa uko yaka impushya, kumenya imyitwarire ye n’ibindi.


Minisitiri w’Urubyiruko n’Ikoranabuhanga, Jean Philbert Nsengimana

Minisitiri w’Urubyiruko n’Ikoranabuhanga, Jean Philbert Nsengimana, yashimye Banki ya Kigali ifashe iya mbere mu kubyaza umusaruro ikoranabuhanga, mu gihe hari ibigo birifitiye ubwoba ko hari ibindi bizaryifashisha bikabatwara abakiliya.

Ibyo ngo si n’ikintu kidashoboka kuko hari amasosiyete akomeye ku Isi amaze gusenyuka azira ko yatinze kumva ko ikoranabuhanga rishobora guhindura imikorere n’imitekerereze, hakaza serivisi ziteye ukundi.

Yagize ati “Iyo ubona rero nka BK itavuga ngo ndi banki nini kurusha izindi mu gihugu, ninjye munini nta cyankoraho, ahubwo nayo ikava mu guhanga udushya ikajya mu mpinduramatwara, usanga ari ikintu gishimishije.”

“Navuga ko intambwe BK imaze kugaragaza ko n’andi mabanki yari akwiye kuyireberaho kuko kugira ngo nk’igihugu tubashe kuba twatera imbere cyane ntabwo ari uko bizakorwa n’umuntu umwe, na leta gusa, banki imwe cyangwa ikigo cy’itumanao kimwe.”

Umuyobozi Mukuru wa Banki ya Kigali, Dr Diane Karusisi yavuze ko iyi banki ifite gahunda yo gukomeza kwagura ibikorwa, kuko urebye uko imikorere yari imeze mu myaka 50 ishize yahindutse, bityo hakenewe kwagura uburyo banki ishoramo imari.

Yagize ati “Iyo urebye mu myaka ishize ukuntu banki yagukaga, yongeraga amashami n’imari shingiro, ni uko byari bimeze. Ariko iyo tureba imbere nko mu myaka mirongo itanu, ntabwo kwagura ibikorwa bya banki bizaba bikiri ugufungura andi mashami.”

“Ahubwo uko tubibona ni uko tuzagura ibikorwa dutanga serivisi zitandukanye, nka serivisi z’ikoranabuhanga, murabizi ko twatangije serivisi z’ubwishingizi, turabona ko hari abandi bantu baje mu bucuruzi bwacu kuko uzi ko nko kohereza amafaranga umuntu adakeneye kujya muri banki, ashobora kubikora muri Mobile Money.”

Dr Karusisi yavuze ko muri BK General Insurance Banki ya Kigali yashoyemo agera miliyari imwe y’amafaranga y’u Rwanda, naho muri BK TecHouse ishoramo miliyoni 300 Frw, ku buryo yizeye ko no mu yindi myaka 50 iri imbere BK izakomeza kuba ikigo gikomeye.


Mukuru wa Banki ya Kigali, Dr Diane Karusisi na Minisitiri w’Urubyiruko n’Ikoranabuhanga, Jean Philbert Nsengimana


Minisitiri Nsengimana na Dr Karusisi batangiza ku mugaragaro BK TechHouse


Dr Karusisi na Minisitiri Nsengimana baganira mu muhango wo gutangiza BK TechHouse


Itsina ry’ abahanga bakoze iyi Porogaramu ya mudasobwa yitwa ‘Urubuto Education System


style="display:inline-block;width:350px;height:300px"
data-ad-client="ca-pub-2460108950092726"
data-ad-slot="6397865272">

-->
INGUFU.com nirwo rubuga wasomagaho iyi nkuru
IBITEKEREZO
Untitled Document
Tanga igitekerezo kuri iyi nkuru